Në Kosovë ditët në vijim pritet që të ketë një rritje të çmimeve të karburantit. Aktualisht çmimi i naftës është 98 centë, kurse i benzinës 1 euro, të cilët priten të rriten me nga 5 centë secila.
Para fillimi të pandemisë së Coronavirusit në Kosovë, çmimi më i lartë i karburanteve para një viti kishte shkuar deri në 80 centë.
Në një intervistë për “KosovaPress” kryetari i Shoqatës së Naftëtarëve në Kosovë, Fadil Berjani shprehet se në tregjet ndërkombëtare ka rritje të çmimit e kjo do të reflektojë ditët në vijim edhe në Kosovë.
“Këto ditë çmimi i është duke u rritur thuajse mund të themi lirisht me një rrihte të lehtë me nga 1 cent në ditë, por në çmimet me pakicë nuk janë duke u lëvizur këto çmime janë që një kohë të gjatë. Përafërsisht pritet të ketë rritje deri në 5 centë. Kjo ndikon në mënyrë automatike, këtu çmimi është sot mesatar 98 centë, do të thotë që do të kemi mbi një euro çmimin në tregun tonë të Kosovës”- u shpreh kryetari i Shoqatës së Naftëtarëve.
Berjani theksoi se pandemia ka ndikuar çmimin e karburanteve, pasi qarkullimi i automjeteve ka qenë i kufizuar gjatë izolimit në pandemi, ndërsa shton se çmimi për momentin në Kosovë është më i lirë në rajon, përveç Maqedonisë së Veriut e cila e ka 20 centë më lirë.
