Ambasadori i BE në Tiranë, Luigi Soreca ka deklaruar qartë në shqip dhe në anglisht se Shqipërisë i takon të jetë pjesë e Bashkimit Europian. Në një video të publikuar nga ambasadori me rastin e Javës Europiane, ai ka theksuar se Shqipëria i ka përmbushur kushtet e vendosura për integrimin në Bashkimin Europian.
“Udhëtimi me ju më ka bërë edhe më të qartë se ne ndajmë të njëjtat vlera, të njëjtën histori dhe të njëjtat aspirata. Vendi juaj është me ne. Kjo është arsyeja pse Bashkimi Europian nuk do të jetë i plotë derisa dhe pjesa tjetër e Ballkanit Perëndimor të bëhen anëtare të Bashkimit Europian. Kjo është ajo për çka po punojmë përditë unë dhe kolegët e mi në delegacionin e BE-së në Tiranë dhe institucionet tona në Bruksel. Tani të gjithë po presim me padurim fillimin e bisedimeve të pranimit. Kushtet janë vendosur dhe janë përmbushur. Ne besojmë se tani është koha për ta bërë këtë hap. Sepse Europa është këtu dhe këtu është Europë”.
Në kuadër të aktivitetit Java e Europës, Delegacioni i BE-së në Shqipëri ka zhvilluar një udhëtim me autobus për 21 ditë nga Vermoshi në Konispol, ku ka ndaluar në çdo bashki, duke zhvilluar takime e aktivitete.
