Konferenca e Kryetarëve e mbledhur këtë paradite vendosi që në seancën e ditës së mërkurë të 9 Qershorit të votohet raporti i Komisionit Hetimor për shkarkimin e Presidentit të Republikës.
Raporti kërkon 94 vota që të miratohet, por sigurimi i votave nga ana e shumicës socialiste duket se nuk është problem, kjo pasi dhe në votime të tjera që është kërkuar shumicë e cilësuar siç ishte marrëveshja e 5 Qershorit apo ndryshimet kushtetuese kanë arritur që t’i sigurojnë.
Por me votimin në parlament procedura e shkarkimit të Presidentit nuk mund të quhet e përfunduar. Gjykata Kushtetuese do të jetë ajo që do të vendos nëse shkeljet e gjetura nga parlamenti e që në raportin e komisionit cilësohen si shkelje të rënda kushtetuese, janë në të vërtetë të tilla.
Aktualisht ky organ është me 7 anëtarë nga 9 që duhet të ketë. Por kërkesa për vlerësimin e shkeljeve kushtetuese nga ana e presidentit, kërkon të mbështetet nga shumica e anëtarëve që janë në detyrë. Pra të paktën 5 prej tyre duhet të shprehen pro shkarkimit.
Mandati i presidentit përfundon në Korrik të 2022 dhe presidenti është përbetuar se do të jetë në zyrën presidenciale deri në 24 Korrikun e vitit të ardhshëm. Nëse Gjykata Kushtetuese do ta gjejë kreun e shtetit në shkelje kushtetuese siç pretendon shumica kjo do të përbënte precedentin e parë të shkarkimit të një Presidenti në vendin tonë.
