Administrata Tatimore ka rikujtuar të gjithë personat fizikë, tregtarët individualë, të vetëpunësuarit dhe subjektet që ushtrojnë aktivitet ekonomik përmes internetit se janë të detyruar të regjistrohen pranë Qendrës Kombëtare të Biznesit (QKB) përpara fillimit të aktivitetit. Sipas autoriteteve, çdo veprimtari tregtare online trajtohet njësoj si biznesi tradicional dhe duhet të jetë e formalizuar ligjërisht, përfshirë publikimin e të dhënave identifikuese në faqen e internetit.
Në rast se konstatohet ushtrim aktiviteti pa regjistrim dhe pa transparencën e kërkuar ligjore, Administrata Tatimore ka paralajmëruar se do të kërkojë ndërhyrjen e Autoritetit të Komunikimeve Elektronike dhe Postare (AKEP) për bllokimin e përkohshëm të faqes ku zhvillohet aktiviteti. Ky bashkëpunim mes institucioneve, sipas tatimeve, synon rritjen e kontrollit dhe luftimin e informalitetit në tregtinë online, e cila është shtuar ndjeshëm vitet e fundit.
Autoritetet theksojnë gjithashtu se çdo subjekt duhet të përmbushë detyrimet tatimore që lidhen me tatimin mbi të ardhurat, TVSH-në, kontributet e sigurimeve shoqërore dhe përdorimin e sistemit të faturimit elektronik, sipas legjislacionit në fuqi. Regjistrimi dhe ndryshimet e të dhënave bëhen përmes platformës e-Albania, ndërsa pas miratimit, informacioni transmetohet automatikisht në sistemin tatimor.
Administrata Tatimore u bën thirrje të gjithë atyre që ushtrojnë ose planifikojnë të ushtrojnë aktivitet tregtar online të formalizojnë biznesin e tyre dhe të respektojnë kuadrin ligjor, në të kundërt rrezikojnë masa administrative, përfshirë edhe bllokimin e aktivitetit online.
