Edhe pse platforma e-Albania nisi funksionimin me një infrastrukturë të re teknologjike dhe standarde të përmirësuara aksesimi, bizneset në vend po raportojnë sërish probleme të shumta në përdorimin e shërbimeve online.
Vetëm pak orë pas rikthimit në funksion të portalit, përdorues të ndryshëm kanë denoncuar vështirësi në akses, ngecje të sistemit dhe pamundësi për të përfunduar procedurat elektronike. Sipas tyre, problematikat që prej muajsh shoqëronin platformën vazhdojnë të mbeten të pazgjidhura.
“E-Albania ngec vazhdimisht dhe shumë shërbime nuk mund të përfundohen. Në disa raste sistemi duket edhe më problematik se më parë”, shprehet një sipërmarrës.
Ankesat lidhen kryesisht me mosshfaqjen e detyrimeve vendore, mosfunksionimin e kryqëzimit të të dhënave me databazat e tjera shtetërore, si dhe me problemet në përdorimin e nënshkrimit elektronik. Bizneset raportojnë gjithashtu se sistemi nuk lejon shkarkimin e faturave apo kryerjen normale të aplikimeve online.
Një pjesë e ekonomistëve dhe kontabilistëve pohojnë se ndërprerjet po sjellin vonesa në procedurat administrative dhe vështirësi në aktivitetin e përditshëm të bizneseve, sidomos në periudha me ngarkesë të lartë deklarimesh dhe pagesash.
Pak ditë më parë, autoritetet njoftuan se portali do të ishte jashtë funksioni nga 15 deri në mëngjesin e 18 majit, për shkak të procesit të përmirësimit të infrastrukturës teknologjike. Megjithatë, problematikat duket se vijojnë edhe pas rikthimit të sistemit online.
