Autoritetet në Lituani iu përgjigjën të premten kërkesës së Bjellorusisë për ekstradimin e lideres së opozitës Svetlana Tikhanovskaya, që braktisi vendin pas akuzave për organizim të protestave të dhunshme.
“Sa i takon kërkesës, përgjigjja është shumë e thjeshtë. Do të ngrijë ferri përpara se Lituania të marrë në konsideratë kërkesën e Lukhashenkos dhe regjimit të tij”, tha Gabrielius Landsbergis, ministër i Jashtëm i Lituanisë.
Ekipi i Tikhanovskaya hodhi poshtë akuzat ndaj saj duke thënë se, edhe pse ajo u takua me njerëz të ndryshëm, përfshirë radikalë, ajo vetë kishte vetëm qëllime paqësore.
Figura kryesore e opozitës bjelloruse humbi përballë presidentit Lukhashenko në zgjedhjet presidenciale të 9 gushtit. Ajo dhe mbështetësit e saj refuzuan të njohin rezultatin, duke e cilësuar procesin të manipuluar.
Rrjedhimisht, protesta masive të paprecedenta për dorëheqjen e Lukhashenkos tronditën Bjellorusinë për muaj me radhë.
