Muzikanti Vasil Konomi, i cili u gjet i pajetë në garazhin e banesës së tij, dyshohet se është helmuar nga gazrat e makinës. Konomi është gjetur i pajetë në garazh, pranë makinës së tij, e cila qëndronte e ndezur prej më shumë se 16 orësh. Paraprakisht dyshohet se Konomi mund të ketë qenë i dehur dhe ta ketë zënë gjumi pranë mjetit të tij, ose të jetë rrëzuar. Qëndrimi i gjatë pranë makinës mund të ketë bërë që 50-vjeçari të ketë ndërruar jetë. Por, gjithsesi, gjithçka mbetet për tu verifikuar. Grupi hetimor ka marrë në pyetje edhe disa persona, familjarë të viktimës, për të sqaruar rrethanat.
Gjirokastër/nformacion paraprak.
Rreth orës 16:00, njoftohemi se në fshatin Goranxi, Bashkia Dropull, në garazh pranë mjetit të tij, është gjetur i pa jetë shtetasi V. K., rreth 50 vjeç, banues në Goranxi, Dropull. Menjëherë në vendngjarje kanë shkuar shërbimet e policisë. Trupi i shtetasit V. K. u transportua në morgun e Spitalit Rajonal Gjirokastër për të kryer ekspertizën mjekoligjore. Grupi hetimor ndodhet në vendngjarje dhe po punojnë për zbardhjen e rrethanave të ngjarjes.
