Kryetari në detyrë i PD, Lulzim Basha shprehet se qeveria po tenton të përçajë demokratët pas zgjedhjeve të 25 Prillit. Në takimin e zhvilluar me anëtarët e kësaj force politike në qarkun e Vlorës, Basha iu bëri thirrje për pjesëmarrje masive në zgjedhjet e 13 Qershorit.
“Kanë vetëm një synim të përçajnë forcën e rritur të Partisë Demokratike, të mbjelli dyshi dhe mosbesim në radhët tona dhe të na bëjë të merremi me veten në vend që të vazhdojmë betejën së bashku. Ndaj, kërkesa ime e parë është ta konsiderojmë këtë proces të brendshëm si një mundësi pozitive jo vetëm për të komunikuar me njëri-tjetrin, por dhe të na sjellë më afër njëri-tjetrit që të dalim më të bashkuar nga ky proces. Në këtë proces i cili duhet të zbatohet sipas të gjitha rregullave statutore, do të konfirmojë edhe një herë vlerat tona dhe duhet ta shohim si një tjetër stacion në betejën që vazhdon deri në largimin e regjimit”, është shprehur Basha.
Basha tha se pavarësisht mosmarrëveshjeve brenda partisë, demokratët do të jenë më të bashkuar pas zgjedhjeve të 13 Qershorit dhe sipas tij, në këtë mënyrë do të vijë ndryshimi në Shqipëri.
“Kushdo që mendon se demokratët anë e mbanë Shqipërisë kanë ndërmend të dorëzohen dhe të pranojnë këtë masakër, e ka shumë shumë gabim. Duhet të jemi të vetëdijshëm për diçka, për barën e përgjegjësisë që ende rrëndon mbi supet tona, të misionit historik, të papërmbushur të 25 Prillit”, është shprehur Basha.
Kryedemokrati tha se finalizimi i aksonit politik i PD është rrëzimi i qeverisë “Rama” për të garantuar demokracinë në vend.
