Një operacion i gjerë policor është duke u zhvilluar në Elbasan dhe zona përreth, në kuadër të goditjes së një grupi të dyshuar për trafik ndërkombëtar të lëndëve narkotike.
Aksioni po realizohet nga forcat speciale RENEA dhe FNSH, në bashkëpunim me SPAK. Sipas informacioneve paraprake, hetimet janë mbështetur në zbërthimin e komunikimeve në aplikacione të koduara, përmes të cilave dyshohet se janë identifikuar persona të përfshirë në trafikun e kokainës nga vendet e Amerikës Latine drejt Europës.
Burime bëjnë me dije se janë lëshuar 18 urdhër-arreste për persona të dyshuar si pjesë e këtij aktiviteti kriminal, ndërsa gjykata ka autorizuar edhe 20 kontrolle banesash në disa zona të qarkut.
Mëngjesin e sotëm, forcat speciale kanë ndërhyrë njëkohësisht në disa pika, përfshirë Prrenjas, Librazhd dhe zona të tjera të qarkut të Elbasanit, me qëllim ekzekutimin e masave të sigurisë dhe kontrollin e ambienteve të dyshuara.
Deri në këtë fazë të operacionit raportohet se janë arrestuar të paktën 10 persona, ndërsa të tjerë janë shpallur në kërkim apo ndaluar në kuadër të hetimeve të mëparshme. Gjithashtu, disa persona janë shoqëruar për verifikime të mëtejshme.
Operacioni vijon, ndërsa autoritetet pritet të japin detaje shtesë mbi strukturën e grupit dhe rolet e personave të përfshirë në këtë aktivitet të dyshuar kriminal.
