Një muaj pasi Joe Biden mori detyrën si president I SHBA, Uashingtoni i është ribashkuar zyrtarisht Marrëveshjes së Parisit për klimën.
Vendimi është mirëpritur edhe nga liderët botërorë, ndërsa fokusi do të jetë strategjia e SHBA-së për të zvogëluar emetimet e dioksidit të karbonit, në përpjekje për të luftuar ngrohjen globale.
Administrata Biden tha se do të njoftojë planet e saj në Ditën e Tokës në muajin prill.
I dërguari i posaçëm i SHBA-së për klimën, John Kerry së bashku me Sekretarin e Përgjithshëm të Kombeve të Bashkuara, Antonio Gutterres do të marrin pjesë në hapjen e Samitit për angazhim global, për të shënuar edhe rikthimin e SHBA-së në këtë marrëveshje.
Mbi 120 shtete janë zotuar se deri në mesin e këtij shekulli do të kenë zero emetime të karbonit.
Ndërkaq shefja e OKB-së për klimën, Christiana Figures tha se është humbur shumë kohë në trajtimin e ndryshimeve klimatike, pa pjesëmarrjen e SHBA.
Më 2017, ish-presidenti amerikan, Donald Trump deklaroi se Uashingtoni do të largohej nga marrëveshja, duke argumentuar se sillte disavantazh ekonomik.
Vendimi për tërheqjen e SHBA-së nga marrëveshja zyrtarisht hyri në fuqi më 4 nëntor 2020, vetëm një ditë pas mbajtjes së zgjedhjeve presidenciale, ku Biden mposhti Trumpin.
