Aeroporti Ndërkombëtar i Tiranës po zgjeron më tej lidhjet ajrore me destinacionet turistike të Mesdheut, ndërsa kompania ajrore Wizz Air ka inauguruar dy linja të reja direkte drejt Spanjës dhe Italisë.
Më 23 qershor u realizua fluturimi i parë mes Tiranës dhe Palma de Mallorca-s, një nga destinacionet më të njohura turistike në Spanjë. Një ditë më pas, më 24 qershor, u inaugurua edhe linja e re Tiranë–Alghero, duke forcuar lidhjet mes Shqipërisë dhe ishullit italian të Sardenjës.
Sipas njoftimit zyrtar, linja Tiranë–Palma de Mallorca do të operojë dy herë në javë, çdo të martë dhe të shtunë, ndërsa fluturimet drejt Algheros do të realizohen çdo të mërkurë dhe të diel.
Hapja e këtyre destinacioneve të reja vjen në kulmin e sezonit turistik veror dhe synon t’u ofrojë udhëtarëve shqiptarë më shumë alternativa për pushime, por edhe të nxisë ardhjen e turistëve të huaj drejt Shqipërisë.
Palma de Mallorca njihet për plazhet e saj, jetën kulturore dhe infrastrukturën moderne turistike, ndërsa Alghero konsiderohet një nga qytetet më tërheqëse të Sardenjës, i njohur për bregdetin, historinë dhe trashëgiminë mesdhetare.
Me shtimin e këtyre linjave, Wizz Air vijon zgjerimin e rrjetit të saj në Shqipëri, ndërsa Aeroporti Ndërkombëtar i Tiranës forcon pozicionin si një nga qendrat kryesore të transportit ajror në rajon. Autoritetet aeroportuale presin që destinacionet e reja të rrisin fluksin e pasagjerëve gjatë sezonit veror dhe të kontribuojnë në zhvillimin e turizmit dhe lëvizshmërisë ndërkombëtare.
