Fermerët e Mallakastra, një nga zonat më të njohura në vend për prodhimin e vajit të ullirit, po përballen me vështirësi të mëdha ekonomike, pasi tonelata të tëra vaji kanë mbetur të pashitura në magazina.
Prodhuesit shprehen se mungesa e tregut dhe çmimet e ulëta të shitjes po i vendosin përballë një situate të vështirë, ndërkohë që kostot për kultivimin, vjeljen dhe përpunimin e ullirit kanë ardhur në rritje.
Sipas fermerëve, një pjesë e konsiderueshme e prodhimit të këtij sezoni vazhdon të mbetet stok, pasi kërkesa në treg është e dobët dhe çmimi nuk arrin të mbulojë shpenzimet e prodhimit. Ata thonë se mungon orientimi dhe mbështetja konkrete nga institucionet për garantimin e tregut dhe promovimin e produktit vendas.
Prodhuesit e vajit të ullirit paralajmërojnë se nëse situata vazhdon në të njëjtat kushte, shumë prej tyre mund të detyrohen të heqin dorë nga aktiviteti, për shkak të humbjeve ekonomike dhe mungesës së fitimit.
Fermerët kërkojnë politika më mbështetëse për bujqësinë, subvencione më efikase dhe masa konkrete për të ndihmuar shitjen e prodhimit vendas, duke theksuar se sektori i ullirit mbetet një nga burimet kryesore të të ardhurave për shumë familje në zonat rurale.
Ekspertët e bujqësisë vlerësojnë se mungesa e organizimit të tregut, kostot e larta të prodhimit dhe konkurrenca nga importet po krijojnë vështirësi të vazhdueshme për fermerët shqiptarë, veçanërisht në sektorët tradicionalë si prodhimi i vajit të ullirit.
