Shqipëria renditet ndër vendet europiane më të ekspozuara ndaj rënies së popullsisë për shkak të emigracionit, veçanërisht të personave në moshë riprodhuese. Ky vlerësim vjen nga Organizata Ndërkombëtare për Migracionin në raportin e saj “World Migration Report 2026”.
Sipas raportit, Europa është kontinenti me numrin më të madh të vendeve që kanë përjetuar tkurrje të popullsisë në periudhën 2005–2024. Në rastin e Shqipërisë, fenomeni lidhet jo vetëm me normat e ulëta të lindshmërisë, por edhe me largimin e të rinjve jashtë vendit, çka ndikon drejtpërdrejt në uljen e lindjeve.
Raporti e rendit Shqipërinë përkrah vendeve si Lituania, Moldavia dhe Bosnjë-Hercegovina, ku fertiliteti është tashmë nën nivelin e zëvendësimit të popullsisë. Në këto kushte, largimi i personave në moshë për të krijuar familje sjell humbje të drejtpërdrejta në numrin e lindjeve.
Të dhënat tregojnë se fenomeni i emigracionit ka marrë përmasa të mëdha. Sipas Eurostat, vetëm në vitin 2024 rreth 48 mijë shqiptarë morën shtetësi në një nga vendet e Bashkimit Europian. Që nga viti 2010, rreth 632 mijë shtetas shqiptarë janë pajisur me pasaporta të BE-së, një shifër që lidhet ngushtë me tkurrjen e popullsisë në vend.
Një tjetër tregues shqetësues është mosha e emigrantëve. Rreth 62% e shqiptarëve që u larguan në vitin 2024 ishin nën 35 vjeç, duke treguar se vendi po humbet pikërisht grupmoshat më aktive dhe më të rëndësishme për tregun e punës dhe për rritjen natyrore të popullsisë.
Ky zhvillim ka reflektuar drejtpërdrejt në rënien e lindjeve. Sipas të dhënave të INSTAT, numri i lindjeve ka pësuar rënie të ndjeshme në dekadën e fundit, ndërsa numri i grave në moshë riprodhuese (20–34 vjeç) është tkurrur ndjeshëm.
Ekspertët paralajmërojnë se kjo prirje mund të sjellë pasoja afatgjata për ekonominë dhe strukturën demografike të vendit, duke përshpejtuar plakjen e popullsisë dhe duke ulur forcën punëtore.
Nëse trendi i emigracionit vijon në këto ritme, Shqipëria rrezikon të përballet me një krizë të thelluar demografike në dekadat e ardhshme, me ndikime të drejtpërdrejta në zhvillimin ekonomik dhe social të vendit.
