Autoriteti Rrugor Shqiptar ka shpallur hapjen e dy procedurave të prokurimit për ndërtimin e Bypass-it të Elbasan, një projekt që synon të përmirësojë lidhjen rrugore mes Tiranës, Elbasanit dhe Korridori VIII.
Sipas dokumenteve zyrtare, bëhet fjalë për dy faza të projektit “Ndërtim rruga lidhëse Tiranë–Elbasan me Korridorin VIII”. Faza e parë ka një fond limit prej rreth 3.3 miliardë lekësh, ndërsa faza e dytë parashikon rreth 2.5 miliardë lekë, duke e çuar vlerën totale të projektit në afro 60 milionë euro.
Segmenti i ri rrugor do të nisë në zonën e Bradasheshit, aty ku përfundon autostrada Tiranë–Elbasan, dhe do të shtrihet në jugperëndim të qytetit. Projekti parashikon ndërtimin e një aksi rrugor me standarde autostrade ndërurbane të kategorisë “A”.
Sipas të dhënave teknike, bypass-i do të ketë një gjatësi prej rreth 4.2 kilometrash dhe do të ndërtohet kryesisht në terren fushor. Projekti ka marrë në konsideratë kushtet gjeologjike, hidrologjike dhe urbanistike të zonës, me synimin për të garantuar siguri dhe qëndrueshmëri të lartë infrastrukturore.
Autoritetet argumentojnë se ndërtimi i bypass-it do të ndikojë në uljen e trafikut brenda qytetit të Elbasanit, shkurtimin e kohës së udhëtimit dhe përmirësimin e sigurisë rrugore për qytetarët dhe bizneset që përdorin këtë aks.
Ky investim konsiderohet pjesë e projekteve infrastrukturore që lidhen me forcimin e lidhjeve rajonale dhe integrimin e korridoreve ndërkombëtare të transportit në Ballkan.
