Detaje të reja kanë dalë në dritë lidhur me ngjarjen e rëndë të regjistruar mëngjesin e sotëm në Mirditë.
Sipas informacioneve paraprake, rreth orës 07:10, në fshatin Shkorrët, përgjatë segmentit rrugor Reps–Spaç, është gjetur i pajetë brenda automjetit të tij një 45-vjeçar, i cili dyshohet se është vrarë me armë zjarri.
Viktima është identifikuar si Valter Lleshi. Ai është konstatuar pa shenja jete në automjetin tip “Toyota”, me të cilin po udhëtonte në momentin e ngjarjes.
Menjëherë pas marrjes së njoftimit, në vendngjarje mbërritën forcat e policisë dhe grupi hetimor, të cilët kanë nisur veprimet për zbardhjen e plotë të rrethanave të krimit, identifikimin e autorëve dhe dokumentimin ligjor të ngjarjes.
Ndërkohë, zona është kontrolluar nga uniformat blu, ndërsa po mblidhen prova dhe dëshmi që mund të ndihmojnë në hetim. Deri tani nuk janë bërë të ditura motivet e ngjarjes, ndërsa hetimet vijojnë.
