Problemet me platformën qeveritare e-Albania vijojnë të shkaktojnë shqetësime për bizneset dhe ekonomistët, edhe pas prezantimit të sistemit të ri që premtonte më shumë shpejtësi dhe funksionalitet.
Përdoruesit raportojnë se shumë shërbime online vazhdojnë të mos funksionojnë siç duhet, ndërsa sistemi shpesh bllokohet ose punon me ndërprerje, duke krijuar vonesa dhe vështirësi në procedurat e përditshme të bizneseve.
Ekonomistët shprehen se nuk arrijnë të aksesojnë platformën e faturave, të kontrollojnë gjendjen e arkës apo të kryejnë aplikime të rëndësishme për subjektet që përfaqësojnë. Probleme raportohen edhe për aplikimet që lidhen me regjimin e përpunimit aktiv dhe pasiv, procedura të përdorura kryesisht nga bizneset fason.
Ndërkohë, qytetarët po hasin vështirësi edhe në shërbime të tjera si aplikimet për leje lindjeje, raportet shëndetësore apo shkarkimi i kartelave të pasurisë. Sipas përdoruesve, sistemi shfaq vazhdimisht mesazhe gabimi ose nuk lejon ngarkimin e dokumenteve të nevojshme.
Ankesa ka edhe për aplikimet pranë Agjencisë së Zhvillimit të Territorit dhe bashkive, ku mungojnë dritaret për ngarkimin e dokumentacionit, duke rrezikuar skadimin e afateve për aplikuesit.
Një tjetër problem i raportuar nga ekonomistët që menaxhojnë disa biznese njëkohësisht është fakti se sistemi nuk lejon kalimin normal nga një NIPT tek tjetri, edhe pas mbylljes së platformës.
Ndërsa AKSHI deklaron se sistemi funksionon normalisht, për shumë biznese dhe financierë puna e përditshme është kthyer në një proces të lodhshëm dhe problematik, me shqetësimet që vijojnë të mbeten pa një zgjidhje konkrete.
