Drejtuesja shqiptare e JPMorgan, Lorna Hajdini, ka hapur një betejë të fortë ligjore në New York, pasi paditi për shpifje ish-bankierin Chirayu Rana, duke i cilësuar si tërësisht të fabrikuara akuzat e tij për abuzim seksual dhe racizëm. Sipas padisë, Hajdini pretendon se ish-punonjësi ka organizuar një fushatë për të dëmtuar reputacionin e saj dhe për të përfituar financiarisht në kurriz të saj dhe bankës JPMorgan.
Çështja ka marrë vëmendje të madhe në Wall Street, ndërsa dokumentet gjyqësore tregojnë se banka nuk ka gjetur prova që mbështesin pretendimet e Rana-s. Avokatët e Hajdinit thonë se akuzat janë dashakeqe dhe të sajuara, ndërsa vetë JPMorgan ka deklaruar publikisht mbështetjen për drejtuesen shqiptare.
Skandali ka tronditur qarqet financiare amerikane, pasi Rana kishte kërkuar miliona dollarë dëmshpërblim dhe kishte ngritur akuza të rënda ndaj një prej emrave më të njohur shqiptarë në sektorin bankar ndërkombëtar. Ndërkohë, karriera e tij në financë duket se është drejt shkatërrimit pas largimeve nga disa kompani të mëdha dhe publikimit të detajeve kontradiktore rreth historisë së tij.
