Influencerja Rachel Kerr është gjetur shëndoshë e mirë, pas disa ditësh shqetësimi dhe kërkimesh nga familja e saj, pasi ishte shpallur e zhdukur që prej 25 prillit. Lajmi u konfirmua nga familjarët, të cilët bënë të ditur se ajo tashmë ndodhet pranë vëllait të saj dhe gjendja e saj është e stabilizuar.
31-vjeçarja nga Dunblane kishte humbur kontaktet pasi kishte bërë check-out nga hoteli ku po qëndronte në Agadir, në Marok. Për disa ditë me radhë, familja nuk kishte asnjë informacion mbi vendndodhjen e saj, çka kishte shkaktuar shqetësim dhe apel publik për ndihmë në rrjete sociale. Autoritetet britanike, përmes Foreign, Commonwealth & Development Office, kishin konfirmuar gjithashtu se po ofronin mbështetje gjatë procesit të kërkimit.
Sipas informacioneve të para, nuk janë bërë publike detaje mbi rrethanat e zhdukjes apo mbi atë që ka ndodhur gjatë ditëve kur ajo nuk kishte kontakte me familjen. Kerr njihet në rrjetet sociale për përmbajtje të fokusuar në udhëtime, si dhe për aktivitetin e saj në modelim dhe komunikim publik. Postimi i saj i fundit ishte regjistruar më 13 prill, ndërsa aktualisht ajo ndodhet jashtë rrezikut dhe nën kujdesin e familjes.
