Administratori i kompanisë Alko Impex, Arbër Abazi, është paraqitur këtë të enjte në ambientet e SPAK, në kuadër të hetimeve që po zhvillohen për dosjen e njohur si “Balluku”. Hetimet lidhen me procedura tenderimi dhe dyshime për parregullsi në projekte publike infrastrukturore, ku në qendër të verifikimeve është edhe ish-zëvendëskryeministrja e vendit.
Sipas të dhënave, Abazi është një nga personat që po pyetet nga prokurorët e posaçëm për rrethanat e procedurave të tenderave, përfshirë edhe ato që lidhen me ndërtimin e segmenteve rrugore në Tiranë. Më herët, SPAK ka kryer kontrolle në ambiente të lidhura me të, në kuadër të hetimeve për projektet e Unazës së Madhe dhe Unazës së Jashtme të Tiranës.
Emri i tij është përmendur në lidhje me procedurën e Lotit 7 të Unazës së Jashtme, ku fitues është shpallur bashkimi i kompanive “Alko-Impex General Construction & 2T” sh.p.k. Hetimet vijojnë ende, ndërsa autoritetet nuk kanë dhënë detaje shtesë mbi rolin e tij në këtë çështje apo mbi masat e mundshme që mund të merren në vijim.
