Pas shumë vitesh premtimesh dhe vonesash, projekti i hekurudhës Durrës–Tiranë–Rinas po hyn në një fazë konkrete zbatimi. Qeveria shqiptare ka nisur zyrtarisht procedurat për përzgjedhjen e operatorit që do të ofrojë shërbimin publik hekurudhor në këtë aks, një linjë që pritet të lidhë portin më të madh të vendit, kryeqytetin dhe Aeroportin Ndërkombëtar të Tiranës.
Sipas dokumenteve të publikuara nga Ministria e Infrastrukturës dhe Energjisë në bashkëpunim me Hekurudhën Shqiptare, kompanitë e interesuara kanë afat deri më 26 korrik 2026 për të shprehur interesin e tyre. Më pas do të zhvillohet procedura konkurruese për përzgjedhjen e operatorit që do të menaxhojë shërbimin.
Parashikimet janë që shërbimi i pasagjerëve të nisë në tremujorin e katërt të vitit 2027. Operatori fitues nuk do të ketë vetëm përgjegjësinë e menaxhimit të linjës, por edhe të sigurimit të trenave, të cilët mund të jenë të rinj, të përdorur ose të marrë me qira, për sa kohë përmbushin standardet teknike dhe të sigurisë.
Në fazën e parë, rrjeti do të përfshijë dy linja kryesore: Tiranë–Durrës dhe Tiranë–Aeroporti i Rinasit. Sipas planifikimeve, do të ketë dhjetëra lëvizje trenash çdo ditë, duke krijuar një alternativë të re transporti për mijëra qytetarë dhe udhëtarë që përdorin aeroportin.
Autoritetet vlerësojnë se për operimin fillestar do të nevojiten të paktën katër njësi elektrike treni, ndërsa me rezervat numri mund të shkojë deri në gjashtë. Kontrata me operatorin pritet të ketë një afat nga 10 deri në 15 vjet dhe do të përfshijë mekanizma vlerësimi për cilësinë, përpikmërinë dhe standardet e shërbimit.
Ky projekt konsiderohet si një nga investimet më të rëndësishme në infrastrukturën hekurudhore shqiptare pas dekadash neglizhence. Përveç lehtësimit të lëvizjes së qytetarëve, ai synon të ulë trafikun rrugor, të reduktojë ndotjen dhe të ofrojë një mënyrë më moderne transporti. Në perspektivë, rrjeti hekurudhor pritet të zgjerohet edhe drejt Hanit të Hotit dhe Pogradecit, duke krijuar një sistem më të integruar transporti në të gjithë vendin.
