Vetëm një ditë pas uljes së çmimeve të karburanteve, Bordi i Transparencës ka vendosur sërish rritje për naftën dhe benzinën në tregun vendas, duke rikthyer naftën mbi pragun e 200 lekëve për litër.
Sipas vendimit të publikuar për datën 16 maj 2026, çmimi i naftës do të tregtohet me maksimum 202 lekë për litër, ose 4 lekë më shumë krahasuar me një ditë më parë. Ndërkohë, benzina do të shitet deri në 188 lekë për litër, me një rritje prej 3 lekësh.
Vendimi hyn në fuqi këtë të shtunë në orën 13:00 dhe do të mbetet në fuqi deri në mbledhjen e ardhshme të Bordit, ku pritet të rishikohen sërish tarifat në bazë të lëvizjeve të tregut ndërkombëtar.
Përveç çmimeve me pakicë, Bordi ka përcaktuar edhe tavanet për shitjen me shumicë. Nafta do të tregtohet me shumicë deri në 190 lekë/litër, ndërsa benzina deri në 176 lekë/litër.
Lëvizjet e shpeshta të çmimeve kanë sjellë reagime dhe pakënaqësi tek qytetarët dhe bizneset, të cilët përballen me kosto të larta transporti dhe rritje të vazhdueshme të shpenzimeve. Rritja e karburanteve pritet të ndikojë zinxhir edhe në çmimet e produkteve dhe shërbimeve të tjera në treg.
