Një raport i fundit i SIGMA ka ngritur shqetësime mbi mënyrën se si hartohen ligjet dhe politikat publike në Shqipëria, duke evidentuar mungesë analize, transparence dhe efektiviteti në procesin vendimmarrës.
Sipas studimit, draft-ligjet që përgatiten nga institucionet shqiptare shpesh nuk shoqërohen me analiza të plota mbi ndikimin që ato mund të kenë në ekonomi dhe shoqëri. Raporti thekson se mungon shqyrtimi i alternativave të ndryshme dhe identifikimi i grupeve që preken nga ndryshimet ligjore.
Një nga problemet më të theksuara lidhet me mungesën e analizës së kostove dhe përfitimeve të ligjeve të propozuara. Sipas ekspertëve të SIGMA-s, Shqipëria rezulton dobët në këtë aspekt, duke mos arritur të përmbushë standardet e kërkuara për vlerësimin e ndikimit rregullator.
Raporti evidenton gjithashtu se Shqipëria ka kabinetet qeveritare më të mëdha në rajon për sa i përket stafit këshillimor, por kjo nuk është reflektuar në përmirësimin e cilësisë së ligjeve apo në raportim më të mirë të rezultateve të politikave publike.
Sipas gjetjeve, edhe ministritë e linjës përballen me vështirësi në hartimin e planeve të qarta të punës dhe objektivave të matshme, duke e bërë të vështirë kontrollin dhe llogaridhënien për përdorimin e fondeve publike.
Në krahasim me vendet e tjera të rajonit, raporti vëren se Mali i Zi dhe Serbia kanë treguar performancë më të mirë në zbatimin e standardeve për analizën dhe monitorimin e politikave publike.
Ekspertët e SIGMA-s theksojnë se sfida kryesore për Shqipërinë mbetet orientimi më efektiv i burimeve njerëzore dhe forcimi i analizës profesionale në hartimin e ligjeve, në mënyrë që politikat publike të jenë më funksionale, transparente dhe të matshme në rezultatet e tyre.
