Përdorimi i inteligjencës artificiale gjeneruese po rritet me ritme të shpejta në Europë, ndërsa Shqipëria dhe Kosova po shfaqen si ndër vendet me adoptimin më të lartë të kësaj teknologjie në rajon dhe më gjerë.
Sipas Anketës Europiane për Kushtet e Punës 2024, të publikuar së fundmi, rreth 12% e punonjësve në vendet e Bashkimi Europian përdorin inteligjencën artificiale gjeneruese në punën e tyre. Megjithatë, Shqipëria dhe Kosova rezultojnë mbi këtë mesatare europiane.
Të dhënat tregojnë se Kosova renditet ndër vendet e para në Europë, me rreth 20% të punonjësve që deklarojnë përdorimin e IA gjeneruese në aktivitetin profesional. Ndërkohë, Shqipëria pozicionohet gjithashtu në nivele të larta, me rreth 18% përdorim, në të njëjtin nivel me vende si Gjermania, Austria dhe Finlanda.
Në kontrast me këtë trend, disa vende të rajonit si Serbia, Bosnjë-Hercegovina dhe Maqedonia e Veriut paraqesin nivele shumë më të ulëta përdorimi të kësaj teknologjie.
Raporti thekson se inteligjenca artificiale gjeneruese përdoret kryesisht në fusha si shkrimi, marketingu, programimi, dizajni dhe analiza e të dhënave. Kjo teknologji është në gjendje të krijojë tekste, imazhe, kode apo materiale të tjera digjitale duke u bazuar në modele të trajnuara me sasi të mëdha informacioni.
Sipas analizës, përdorimi i IA gjeneruese është më i lartë tek të rinjtë dhe profesionet që kërkojnë njohuri të avancuara digjitale. Gjithashtu, raporti vëren se punonjësit që përdorin këto mjete raportojnë më pak detyra monotone dhe më shumë autonomi në punë.
Ekspertët vlerësojnë se përhapja e shpejtë e inteligjencës artificiale mund të sjellë rritje të produktivitetit dhe transformim të tregut të punës, por paralelisht ngre edhe sfida për aftësimin profesional dhe përshtatjen e brezave më të vjetër me teknologjitë e reja.
Anketa Europiane për Kushtet e Punës është realizuar në 35 vende europiane dhe bazohet në mbi 36 mijë intervista, duke ofruar një panoramë të gjerë mbi zhvillimet në tregun e punës dhe ndikimin e teknologjisë në jetën profesionale.
