Shqipëria mban vendin e parë në Europë për normën më të lartë të martesave, me 6.8 lidhje për 1,000 banorë në vitin 2024, duke lënë pas mesataren europiane prej vetëm 3.9. Megjithatë, ky rekord po zbehet nga një tendencë e re: rritja galopante e divorceve. Sipas të dhënave të fundit të Eurostat dhe INSTAT, vendi ynë renditet i 11-ti në rang kontinenti për numrin e lartë të ndarjeve, por nëse përjashtojmë vendet baltike, Shqipëria ngjitet në vendin e pestë, pas Turqisë dhe vendeve nordike.
Statistikat tregojnë një ndryshim drastik të shoqërisë shqiptare ndër vite. Ndërsa në vitin 1964 norma e divorceve ishte vetëm 0.6 për 1,000 banorë, sot ajo është rritur me 233%, duke arritur në 2.0. Praktikisht, në vitin 2024, numri i martesave ra në nivelin minimal historik prej rreth 16 mijë, ndërsa divorcet u trefishuan krahasuar me vitet ’90. Ky realitet i ri tregon se aktualisht në Shqipëri, një në çdo tre martesa nuk arrin të zgjasë, duke thyer traditën e dikurshme të familjeve të qëndrueshme.
