Një shtetas shqiptar është arrestuar nga autoritetet në Itali, pasi u kap duke transportuar një sasi të konsiderueshme lënde narkotike në automjetin e tij.
Sipas mediave italiane, gjatë kontrollit të mjetit janë gjetur dhe sekuestruar 45 kilogramë kokainë, të ndara në rreth 40 pako, secila me peshë rreth 1 kilogram. Lënda narkotike ishte e paketuar me kujdes dhe mbante një logo të ngjashme me atë të markës së njohur Tiffany & Co., çka dyshohet se përdoret për identifikimin e cilësisë në tregun e paligjshëm.
Kontrollet kanë vijuar edhe në banesën e të arrestuarit, ku policia ka sekuestruar një tjetër automjet në pronësi të tij, rreth 1 kilogram kokainë shtesë si dhe 10 mijë euro në para cash.
Burime bëjnë me dije se vlera e drogës së sekuestruar në treg kap shifrën e rreth 2.5 milionë eurove. Gjatë ndalimit, i dyshuari ka shfaqur sjellje nervoze dhe ka dhënë deklarime të paqarta mbi arsyen e lëvizjes, duke ngritur më tej dyshimet e autoriteteve.
Ky është rasti i dytë i kapjes së kokainës nga policia rrugore italiane në një periudhë të shkurtër kohore, pas një operacioni të zhvilluar në fund të muajit mars, ku u sekuestruan 2 kilogramë lëndë narkotike pas një ndjekjeje të gjatë.
Shqiptari është arrestuar nën akuzën e trafikimit të lëndëve narkotike dhe pritet të përballet me drejtësinë italiane, ndërsa hetimet vijojnë për të zbuluar lidhje të mundshme me rrjete më të gjera kriminale.
