Rritja e pagave në Shqipëri po mbetet vetëm në letra, pasi shtrenjtimi i jetesës po gërryen çdo ditë fuqinë blerëse të qytetarëve. Sipas të dhënave të INSTAT, edhe pse paga mesatare nominale është rritur në rreth 86 mijë lekë, në realitet shqiptarët blejnë shumë më pak produkte dhe shërbime sesa disa vite më parë.
Ekspertët paralajmërojnë se diferenca mes pagës reale dhe asaj nominale po thellohet nga inflacioni dhe rritja e vazhdueshme e çmimeve për ushqimet, qiratë, energjinë dhe shërbimet bazë. Në praktikë, familjet shqiptare po përballen me një varfërim të heshtur, ku rroga duket më e lartë, por standardi i jetesës mbetet i njëjtë ose përkeqësohet.
Sipas analizave ekonomike, rritja e pagave nuk po mbështetet nga zhvillimi i prodhimit apo ekonomisë reale, por kryesisht nga mungesa e fuqisë punëtore dhe vendimet administrative. Kjo situatë ka sjellë një tjetër efekt zinxhir: rritjen e mëtejshme të çmimeve në treg.
Në fund, shqiptarët marrin më shumë lekë në bankë, por dalin nga supermarketet me më pak produkte në çanta.
