Mbyllja e spitalit të Tepelenës “Përparim Tepelena” po shihet nga banorët si një kambanë alarmi jo vetëm për shëndetësinë në jug të vendit, por edhe për procesin e vazhdueshëm të boshatisjes së qyteteve të vogla. Vendimi, i cili pritet të zbatohet gjatë këtij viti në kuadër të riorganizimit të shërbimeve shëndetësore, ka shkaktuar reagime dhe shqetësim te qytetarët e Tepelenës dhe zonave përreth.
Banorët shprehen se mbyllja e këtij institucioni do të sjellë pasoja të drejtpërdrejta si për jetën e tyre, ashtu edhe për ekonominë familjare. Sipas tyre, spitali i Tepelenës ka qenë për vite me radhë një pikë kyçe për marrjen e shërbimeve shëndetësore, jo vetëm për qytetin, por edhe për dhjetëra fshatra të zonës. Në rast urgjencash, ata thonë se distanca drejt spitaleve të tjera, si në Gjirokastër apo Fier, mund të rrezikojë jetën e pacientëve.
Nga ana tjetër, qytetarët theksojnë se mjekët dhe stafi i spitalit kanë qenë gjithmonë të përkushtuar dhe kanë dhënë përgjigjen e duhur për pacientët. Ata vlerësojnë profesionalizmin e personelit shëndetësor, duke thënë se pavarësisht kushteve jo gjithmonë optimale, shërbimi ndaj komunitetit ka qenë i vazhdueshëm.
Shqetësimi i banorëve lidhet edhe me faktin se mbyllja e institucioneve të rëndësishme publike, si spitalet, shkollat apo shërbimet e tjera bazë, perfshire dhe burgun e Bençes qe u mbyll pak muaj mepare po ndikon drejtpërdrejt në largimin e njerëzve nga qytetet e vogla. Sipas tyre, pa shërbime jetike, qytetet rrezikojnë të humbasin gradualisht popullsinë dhe të mbeten vetëm me një numër të kufizuar banorësh.
Ndërkohë, qytetarët kërkojnë që institucionet përgjegjëse të rishikojnë vendimin dhe të marrin në konsideratë nevojat e komunitetit lokal. Ata shpresojnë që spitali të vazhdojë të funksionojë dhe të forcohet me investime dhe staf, në mënyrë që të garantohet shërbim shëndetësor për të gjithë banorët e zonës.
